港大同中大一年一度嘅辯論賽，原定四月中舉行，但受沙士影響延期至今個周末至開鑼，兩大辯論隊成員個個都雄辯滔滔，到時肯定口水花四濺，若然病毒經由飛沫傳播，都咪話唔得人驚，負責籌備比賽嘅同學噚日就開會商討呢個問題，最後決定上場比賽嘅同學一律唔會戴口罩，而到場觀戰者同嘉賓、評判就悉隨尊便。
負責籌辦比賽嘅同學解釋，「大會唔會提供口罩，不過到場者可以自備戴上，由於戴口罩唔方便講嘢，所以參賽者唔會戴口罩，但我哋會加個咪套，確保衞生。」
兩大辯論賽由七二年開始，今年已係第三十二屆，早年比賽原來係兩大代表組成混合隊伍比賽，八三年至改為兩大正式對壘，而二○○○年開始更加入普通話賽事，所以𠵱家比賽係以兩文三語共三場賽事決勝負。
傳真︰2623-9278
電郵︰