AC米蘭前鋒舒夫真高今季一射入重要入球，總會話獻畀已故教練盧班諾夫斯基，多謝對方當年嘅提攜，佢重誓神劈願話季尾會返祖家向恩師謝恩。舒夫真高果然履行承諾，前日親自捧個歐冠盃返基輔，到恩師銅像面前致意。有個咁重情義嘅高足，「盧班」在天之靈都安慰囉。
呢件感人事連我求大俠睇完都有啲感觸，又難怪舒夫真高咁敬重「盧班」嘅，話晒無對方當年提攜同指導，佢都未必有機會出國搵食，更加唔使旨意好似𠵱家咁威水，衣錦還鄉。呢件事唔單止證明舒夫真高重情義，AC肯借過盃畀佢捧返國威威，證明會方不知幾重視呢個鋒將，佢響AC重大把前途。
前晚英格蘭友賽「塞黑」場波果然旨在試陣，落場球員好似走馬看花，換完一個又一個，最搞嘢係英格蘭成場有四個人戴過隊長臂章，響國際賽都算少見。最正係利物浦嘅加歷查過到六分鐘國家隊隊長癮，老咗都可以同子孫講番呢件威水史。
利物浦領隊侯利亞日前撬咗富咸助教戴文奴，擺明益自己法國友。雖然侯利亞當年教法國國家隊時，戴文奴都係佢助手，一齊發掘咗好似亨利同加拿斯呢啲名將，之但係佢今年響富咸冇乜功績，隊波成績勁衰，侯利亞今次用人唯親似賭博，一衰咗連自己都唔掂。
樸茨茅夫來季升上超聯，領隊哈利列納野心勃勃，最近招攬目標竟然係皇家蘇斯達嘅當紅前鋒高華斯域。我求大俠聽到呢個消息，第一個感覺當然係覺得佢大想頭，話晒人哋今季咁威水，使憂冇大球會斟咩。試問佢點肯龍游淺水，加盟一支無歐洲賽參賽資格嘅球會呢？
羅馬響星期二經過長達三個鐘嘅危機會議後，會長辛斯終於落實畀大筆錢教練卡比路擴軍，而卡比路亦決定留效。不過辛斯以前都試過開空頭支票，話畀錢買人最後又冇買，所以我求大俠覺得星級球員一日未加盟，羅馬躉都係咪老定住。
球圈吹淡風，連應屆足球先生和仔都俾南華棄用。其實，球員打生打死，最後一句削班費就冇情義講，唔灰就假。好在，球圈仍然有好似愉園官永義咁講義氣嘅老細，噚日佢帶隊入長洲扒龍舟時，就話自己班球員一定唔會失業，好似羅繼華同李培呢啲準備收山嘅球員，可以去佢公司返工，真係聞者戥佢哋開心。