港股昨日假期，亞太區股市普遍向好，恒指假後相信仍會向上移。電訊股中，聯通（762）假前有勢，其他電訊股料會受到帶動。
中移動Call輪吼兩件，9754同9768。9754今年9月到期，現價26仙，溢價2.7%，槓桿率7.2倍。9768亦係9月夠鐘，現價33.5仙，溢價2.7%，槓桿率5.6倍。想搏殺，刺激啲，則揀9706，8月到期，槓桿率20.2倍，爆炸力強好多，當然溢價要畀高啲，去到9.8%。
和黃（013）都算電訊股，買些少Call輪博搵短錢，對象有9666同9811。9666現價19.1仙，溢價1.7%，槓桿率25.4倍，留意時日無多，本月下旬夠鐘。9811今年10月到期，現價49.5仙，負溢價1.3%，槓桿率9.8倍。
電盈（008）近排落後同類股及落後大市，有機會追番啲上去，揀Call輪炒，只得1件有得諗，就係9766，11月到期，現價65仙，溢價12.4%，槓桿率8.1倍。其他幾件，嫌溢價過高，除非正股升得比較勁，否則着數有限。
中銀（2388）近期有負面消息，中銀Call輪暫處捱打格，唔好貪平買Call輪住。當中9457同9612風險最高，溢價16%與14%，好難守落去。想趁中銀畀人降級搵錢，揀Put輪9653，下月到期，現價20.6仙，溢價2.9%，槓桿率38.4倍。
章盛