以前被視為「蠱惑仔身份證」的紋身，搖身變成年輕人的潮流標誌，而且有埋明星勁煲，想唔Hit都幾難，特別是開始踏入火辣辣季節，街上個個背心短褲，成為Show紋身最佳季節。紋身隨時喺路人甲乙丙身上搵到一、兩個，不過，當然再不是想當年的龍虎鳳咁Out。究竟近期至潮紋身係乜，就由呢班街頭型人Show畀你睇！
記者：招佩珊
攝影：陳陶鈞、梁細權
女人最熱門的紋身部位首推背脊，而男人最近大熱目標則是一雙飛毛腿，街頭就有不少男人露出紋得花碌碌的小腿。特點是圖案大、色彩豐富，成對長襪咁款，夏天晒出嚟就最啱。
要搵最型最潮的紋身，當然要去銅鑼灣同尖沙嘴呢兩個型人集中地。而我所搵到的紋身型人，大部份都是打扮入時，女的就一定穿小背心，而男的則多數着四個骨褲，將個紋身Show出來。
街頭所見的紋身圖案的確有好多款，唔少係彩色圖案，莫非係今年最熱門之選？果然，問過紋身師Gabe，原來近年興彩色圖案紋身，當然並非舊時蠱惑仔身上的龍虎鳳，時下的彩色紋身非常細緻兼好有立體感。一向都好受歡迎的圖騰依然多人揀，但近期女士們就偏好蝴蝶同一些迷你圖案，好似甲蟲仔呢類。男士們則較喜歡較大型圖案，但無論大定細，今期至Hit一定係彩。
其實鏡頭後還有好多不願上鏡的紋身人，或者，唔多習慣袒胸露臂於人前。至於肯上鏡的型人，大部份都係因為覺得紋身靚，亦有一些覺得紋身是一種藝術。的確，同以前的傳統圖案相比，眼前所見的各款彩色和立體感兼備的紋身圖案無疑好靚，但要記住紋身會跟你一世，雖則話可以做手術清除，但又何必？所以都係要諗清楚。
為愛嘅人紋身，並非新鮮事物，不過自從「阿菲」同「檸檬」玩情侶紋身，唔少後生仔都開始跟風，不過紋身係一生一世嘅事，而另外一半就……未知是否這原因，情侶一起紋身都未成氣候，不過我就好彩碰上這一對，Max和Young。
尖沙嘴的DragonWaiBodyArtStudio，算是本地的熱門紋身店，多得明星效應催谷，張栢芝、何超儀等藝人都曾經幫襯。而在銅鑼灣的BoomStudio，舖仔雖細，但勝在可以穿埋耳環、臍環等，亦可以做番個臨時紋身。
DragonWaiBodyArtStudio
電話：23117815（要預約）
地址：尖沙嘴加連威老道30號1樓
價錢：$500?3,000
BoomStudio（28342372）
地址：銅鑼灣謝斐道509號銀座商場7?號舖
價錢：永久紋身$400起、臨時紋身約$100（可維持兩星期）