港股繼續向250日平均線（9639）上移，端午假前恒指以9662收市，終於升破此重大阻力位，不過係咪技術陷阱就比較難講，因為成交比前排確係少咗，上升動力似乎有限。
周正毅事件愈鬧愈大，中銀香港（2388）亦受到影響。據Cookie話，證券界一般都認為事件對中銀影響有限，但好衰唔衰，新任總裁和廣北四出同證券分析員打招呼，會面時焦點自然擺係問題貸款方面，呢啲咁敏感嘅嘢，和廣北又點會亂講，結果分析員覺得中銀透明度下降，中銀沽壓大增，周二跌2.5%，收報7.90元，成交達1.34億元。
近排芬佬愛着草，當然唔係話有好多基金炒爆煲要走佬，而係基金近日爭住搶購鞋股，向大股東要完貨之後，重要在街外掃貨。裕元（551）大股東上次配股予基金後，股價屢創新高，周二再升4.6%，收19.35元。港台集團（645）又傳大股東減持，配股畀基金，周二有3500萬股上板，每股作價0.98元，股價全日升4.85%，收報1.08元。
新怡（1094）亦話有投資者想認購股份，但到放假前都未搞掂，股價開始回軟，周二收報0.435元，跌3.33%。黑客話，近年股票基金表現差，芬佬若要繼續生存，必須要扭轉頹勢，炒工業股似乎係最快捷嘅方法。
三商行（990）周二乾升30%，收報3.5仙。市場即傳出好事近，大股東達利國際（608）同國內買家傾得好埋，好快會達成出售三商行協議，連帶達利亦升4.76%。e莉莎話，市場上成衣股唔少，而達利叫價頗高，單deal未必一定傾得成，所以跟炒三商行要小心。
阿虎