陳妙瑛噚日喺銅鑼灣宣傳由佢做代理嘅化妝品，重即場幫代言人梁敏儀（Winnie）化妝。原來陳妙瑛第一次幫人化妝，佢話心情有啲緊張，加上場地嘅冷氣開得好勁，見到佢手震震咁都要照頂，都幾慘㗎。
相反Winnie就着露背連身裙亮相，見佢對手起晒雞皮，但都冇話凍，真係識做。唔怪得老闆娘搵佢拍多輯硬照廣告啦！
而之前有傳修身丸代言人廖碧兒唔肯性感，所以俾人飛出局，而代理該修身丸嘅陳妙瑛就話其實係廖碧兒約滿，而唔係飛佢，陳妙瑛話：「絕對冇咁嘅事，廖碧兒收身好成功，又唔需要刻意性感，只不過我哋想搵多啲成功例子。」
楊恭如嘅朋友周正毅喺內地被扣查，周正毅太太毛玉萍日前亦喺香港被廉署帶返總部協助調查。噚日有周刊話毛玉萍被帶返廉署嗰日，楊恭如正同朋友喺私竇狂歡。楊恭如噚日透過經理人回應，佢否認開派對狂歡，楊恭如經理人話：「普通朋友聚會，俾佢作到面目全非。」
曾經同余文樂因合演電視劇《愛情白皮書》而傳緋聞嘅楊丞琳，噚日喺台灣見記者時，話自己嘅一身打扮係今年夏天最流行嘅衣着。楊丞琳重話手上嘅LVSpeedy手袋，係朋友夾份送畀佢嘅生日禮物，開心到佢死死吓。唔知余文樂有冇送生日禮物畀佢呢個緋聞女友呢？
蔡依林最近學業、事業兩得意，除咗順利大學畢業外，噚日又獲台灣g-music風雲榜頒發雙月冠軍獎盃，真係雙喜臨門。蔡依林話好多畢業同學想做有關娛樂圈嘅工作，叫佢幫手介紹，有啲重話要做佢助手㖭，搞到蔡依林變咗職業介紹所咁。
石修個仔陳宇琛嘅緋聞女友Kawaii，日前承認曾經嬲過傳係佢情敵嘅嘉碧儀。陳宇琛前晚錄影《紅星追聲名歌SING》時，話唔信Kawaii會咁講，覺得係傳媒亂寫。佢話Kawaii打過電話同佢講呢件事，重驚嘉碧儀睇到會唔開心，石仔強調自己同Kawaii、嘉碧儀兩個都冇拍拖，𠵱家工作最重要喎。
汪琳噚日出席大埔嘅「古典情懷樂繽紛」，見佢剪咗頭短髮，好有夏天氣息。汪琳提到四月時甲狀腺有事，體重暴升至一百二十磅，佢話：「之前突然間肥咗，連朋友都覺得奇怪，所以佢哋叫我去睇醫生，原來真係甲狀腺有事。我入養和住咗三日，其間好多朋友冇因非典型肺炎離棄我，重嚟探病，真係好感動。」
