高大威猛的陳豪小時候肥肥白白，外號「豬肉成」。「豬肉成」與兩個哥哥感情要好，原來陳母為了團結三兄弟，實行其中兩兄弟打架，三兄弟就一起受罰，以鍛煉他們團結一心。
三十二歲的陳豪跟兩個哥哥一樣，小小年紀已長得牛高馬大，陳豪相信與飲食習慣有關，他日前說：「唔知係咪同我細個食得多蛋白質嘅嘢有關呢，因為細細個我已經好鍾意食雞蛋，一日食成四、五隻，而我大哥就一日到晚飲牛奶，雖然二哥冇乜特別飲食習慣，但我哋三兄弟企埋一齊真係差唔多高。」
陳豪不但長得高，小時候還是肥仔一名，家人為他起了「豬肉成」這個乳名，陳豪笑說：「我記得係阿嫲同阿爺幫我改，因為我一出世已經有成八磅重，而且細細個就有個大肚腩，不過大個咗屋企人已經冇咁叫我。」
陳豪大哥現年三十四歲，二哥三十三歲，三兄弟感情十分要好，可能與陳母從小教他們三兄弟要團結有關，陳豪說：「每次我哋三兄弟其中兩個打交，媽咪就會一次過罰三個人，佢話咁樣做係訓練我哋團結精神喎！至於媽咪處罰嘅方法，就係用皮帶打patpat，鞭鞭到肉，不過我哋唔單止冇因為咁而嬲媽咪，反而覺得佢咁做真係可以鞏固我哋嘅感情。」
在陳豪十多歲時，其任職麻醉師的父親不幸病逝，自此陳母獨力養家。為了讓兒子有良好讀書環境，遂決定移民澳洲，讓兒子在外國修讀大學。母親的無私付出，令陳豪無言感激，他說：「雖然大哥𠵱家喺內地做嘢，我同二哥又各有各忙，但三兄弟感情依然咁好，其實全靠媽咪當年一番努力咋！」
採訪：戴彩煥
