楊思琦、陳穎妍、陳敏之、羅敏莊、張美妮、洪天明同李浩林等一班《娛樂大搜查》節目主持人，噚日喺將軍澳電視廣播城慶祝《娛樂大搜查》播映一周年，幾位主持重開香檳同切蛋糕慶祝，氣氛熱鬧。
喺嚟緊嘅節目裏面，幾位主持重獲DTC國際鑽石商貿公司贊助鑽飾，噚日楊思琦、陳穎妍、陳敏之同洪天明等主持重率先佩戴總值近百萬元嘅鑽飾。
楊思琦話咁大個女收到嘅第一隻鑽戒係媽咪送嘅，不過佢就好想收到男仔送嘅鑽石。問楊思琦有冇收過緋聞男友李永豪送嘅鑽石，佢話：「冇收過佢任何禮物，我都係鍾意自己買，自己賺錢買番嚟係好開心。」另外，監製蕭國雄話《大搜查》下星期會播出沈殿霞訪問華仔嘅專訪，訪問中華仔話唔鍾意自己對香雞腳咁話。
葉璇噚日喺將軍澳電視廣播城出現，佢話嚟緊有機會返內地拍歌舞劇《東方茶花女》，酬勞方面有成六位數字，都算唔錯，不過𠵱家重未知度唔度到期演出。
問葉璇覺得自己嘅歌藝得唔得，佢話：「我對跳舞會比較有信心，不過唱幾句都得㗎！」
盧巧音嘅新唱片突破金唱片銷量，唱片公司噚日推出全新嘅唱片封面，重定名為夏日火熱look，見盧巧音着得幾性感同大膽，實行以性感刺激銷量。
唱片公司下月會幫盧巧音舉行一個野外同樂會，到時盧巧音會同fans一齊享受大自然。
麥浚龍（Juno）噚日去新城娛樂台接受節目《聯Fan所》訪問，今日係端午節，所以噚日有歌迷送糭畀佢應吓節，Juno話：「好熟嘅fans送嘅食物我會食，但媽咪都叫我小心啲，上次佢哋送過食得嘅咖喱雞畀我㖭。」Juno話去噚晚舉行《六樓后座》嘅首映時，唔會避開蕭正楠，重會同佢打招呼。
張文慈同黃浩然合作拍電影《黑白森林》，喺戲入面張文慈竟然做黃浩然嘅媽媽。張文慈話係王晶搵佢做呢個角色，要做老角佢自己就冇所謂，最緊要角色有得發揮。
而王晶就猛讚張文慈做得好好，雖然戲份唔多，但就好搶鏡。
