只要價錢夠平，就唔怕冇買家，好似屯門澤豐花園，啱啱有個銀主盤，個客睇完後二話不說即落槌，就係見價錢係屋苑最平。
祥益地產海翠分行經理潘鈺恒透露，單位係高層B室，533方呎，自由市場成交價只係39萬，每方呎732蚊，創新低。呢個銀主盤放售已經三個月，最初叫價54萬，梗係賣唔出啦。後嚟銀主減到39萬，有十幾枱客睇樓，其中一名客人睇完之後就即時話買，祥益免得好事多磨，嗱嗱臨攞住張票趕出市區交畀銀主，即日搞掂。
潘鈺恒話，買家原本諗住喺區內搵啲三四百呎嘅舊樓，見到呢個銀主盤樓齡得八九年，重有成五百幾呎，梗係嗱嗱聲入市啦。佢重係用一次過付款方式買嚟自住㖭。
屋苑𠵱家有一個同呎數銀主單位放盤，但叫價就要48萬。另外有50個放盤，叫價每方呎850到900蚊。
大型發展商長實，同一時間發售嘅住宅樓盤超過五個，淨係西九龍區就有凱帆軒、泓景臺，同埋盈暉臺。
噚日荔枝角盈暉臺開記者會，宣布增添系列優惠禮品，重喺全新示範單位展示禮品之一等離子電視，但見纏上嘅紅色蝴蝶結（圖二），隱約睇到「歡迎泓景臺……」等字樣。蘭西相信，呢個情況一定係同𠵱家好流行嘅環保概念有密切關係嘞。
新地元朗YOHOTown係今年嘅大盤之一，重未開賣，各大地產代理已經做定工夫。美聯就話，禮拜六喺屯門卓爾居搞招聘會，計劃請二百名YOHO置業大使，有底薪、佣金同獎金，薪金最高一萬蚊。為配合樓盤形象，會對呢班大使有特別要求，就係要開朗、年輕同埋有活力，有無代理牌反而唔重要，因為重有一個月時間培訓。
新地代理總經理周國賢話，宣傳工作已進入第二階段，除繼續介紹樓盤概念外，就係開始硬銷工作，位於元朗嘅示範單位，預計6月20日完成裝修。
中原集團嘅網上地圖──中原地圖，瀏覽次數已經超過一億，中原執行董事張奕威話，中原地圖喺99年11月推出，初期啲人上網睇地圖，平均每日約萬五幅，𠵱家已增至十六萬幅，所以公司已更新系統，以應付需求。
另外，近期港人對環境衞生同生態旅遊興趣大增，所以中原地圖也加入以環境生態做主題嘅資訊（圖四），好似水浸黑點、廢物回收地點，重有唔少得嘅係，邊度可以睇到中華白海豚、紅樹林同其他有生態價值動植物嘅地方。
「沙士」疫情漸淡化，代理行紛紛增兵迎接即將來臨嘅新盤潮，香港置業計劃三個月內增聘八十人。噚日就有四十幾名新同事返工，公司副主席朱德朗重同佢哋分享銷售心得，同埋公司管理文化。
另一邊廂嘅利嘉閣，執行董事廖偉強話，計劃請多一百人，其中一半主力做一手，其餘就攻二手同豪宅。
另外，金豐鴻運營業董事關仲年透露，正式成立一手專組，加強對新人培訓。主管級同精英重會安排去上海總部觀摩，第一批噚日出發。
蘭西
電郵地址：
