疫潮漸退，今年端午節肯定大把市民湧去睇龍舟競渡同游龍舟水，佳節日子亦係高官落區做騷嘅好時機，俾人謔稱「垃圾松」嘅財爺梁錦松，今日會去沙田城門河，據聞有區議員度咗條贈興好橋（真係贈興，唔係攞景），請阿松即場「接糭」，點解要「接糭」呢？知情街坊解釋，佢哋會將一連串「振興經濟」、「消滅財赤」、「減少失業」諸如此類善頌善禱字條，掛喺隻糭度等阿松「接糭」，寓意好事「接踵」而來喎！香港好固然重要，不過廉記近排專打大老虎，相信阿松最想係「大步檻過」，唔好被老廉叫去飲咖啡。
阿松去「接糭」，老董就同民政事務局局長何志平一齊去屯門同大埔睇人扒龍舟，聽講特首揀呢兩個區做騷，係想顯示大埔疫情已經平息好安全，實行與民同樂；而政務司司長曾蔭權煲呔就去香港仔，佢𠵱家做咗清潔組阿頭，唔知會唔會順便視察吓香港仔避風塘？
大家都知避風塘環境如何，煲呔過門都係客，正傷腦筋好唔好講啲殺風景說話，但八方相信唔輪到佢開聲，事關高官駕臨，班馬仔肯定一早洗定太平地。
兩位司長同老董四圍走，律政司司長梁愛詩今年卻可免役，唔知係咪忙於同保安局局長葉劉淑儀搞二十三條呢？
傳真︰2623-9278
電郵︰