愛華頓拖住唔簽李鐵，一直都講緊係因為無資金。不過，英國傳媒噚日就爆咗「拖肥糖」會簽布力般中場鄧尼，轉會費重要成五百五十萬鎊（約七千萬港元）㖭！
愛華頓領隊莫耶斯一直都話，唔會喺今夏轉會市場有太大動作，早排簽咗尤保之後，剩番用作買球員嘅資金得百多萬鎊，搞到李鐵正式轉會交易轉為要求再借一年。不過，今次英國傳媒突然間爆咗「拖肥糖」買鄧尼，轉會費重高達五百五十萬鎊，如果消息屬實，愛華頓即係自打嘴巴，李鐵轉會費只係一百多萬鎊就話無資金，點知暗地裏就重金收購鄧尼，我求大俠都戥李鐵唔抵，怕且李鐵叠埋心水搵其他球會落班好過。
車路士喺家陣重標價一千萬鎊斟中田英壽。點解「車仔」咁闊綽？主席碧斯當然想利用中田市場價值，唔單止電視轉播費收益，重想計劃吸引日本遊客帶旺車路士村，等條村唔使蝕本經營。我求大俠相信，掟一千萬鎊出嚟投資中田身上，回報率隨時真係以倍計！
歐洲足協打算來季將歐冠盃及足協盃賽事，安排喺唔同嘅星期進行，作用係希望提升番足協盃對球迷嘅吸引力。我求大俠都贊成咁做，一來大家唔使睇咗兩晚歐冠盃呢啲咁高水準賽事之後，對足協盃有啲厭嘅感覺；二來對我哋嚟講，亦唔再需要連續三晚捱眼瞓深夜睇波嘛！
阿積士日前話佢哋技術總監比赫加，因私人理由請辭，比赫加亦回應得好傷感；名牌教練最後都要黯然離場，我求大俠覺得好欷歔！點知轉過頭，墨西哥阿美利加宣布委任比赫加做教練，人工重好高㖭！其實人望高處，「跳槽」又怕咩講呢？𠵱家咪又係全世界都知道！
將於○四年成為NBA新成員嘅夏洛特班主莊遜，噚日自爆上個禮拜同米高佐敦晚飯，積極游說佐敦加盟佢支新球會，講到明會將部份股票賣畀佐敦，重想委任呢位名將做會長，重可以對球隊事務話晒事。莊遜咁有誠意，睇怕佐敦好快有「着落」囉！
《紐約時報》最近訪問咗前NBA籃板王洛文，今年成四十二歲嘅壞老孩嘅生活依然放蕩不羈，說話依然喺係口沒遮攔。不過當提到籃球時，佢就突然沉默咗，慢條斯理話好想再打多一兩年波，重話想教WNBA過癮吓。老實講，洛文個名早已經臭晒，𠵱家根本就冇人敢請佢打波，重話搵佢做教WNBA，唔通真喺貪佢夠好色咩！