昨日升幅最大嘅窩輪，多數係仙輪。價位細，變化容易誇張。
排頭位嘅係聯通Call輪9383，前市幾乎冇得再跌，報1.1仙，昨升至1.9仙，升幅73%，有74球易手。正股（762）收5.05元，升3.1%，帶起隻輪。不過，隻輪9月中到期，行使價5.88元，隻輪生存嘅機會唔係好大。
當然，世事無絕對，大半年前，正股都見過6.25元，高過隻輪嘅行使價。又不過，賭呢隻輪者都預咗，輪晒都係無傷大雅。想博聯通上升喺啲Call輪身上搵銀，其實冇乜Call輪可搵，除9383之外，其他件件都因為溢價過高，買唔落手，兼且冇成交。
先幾日提過嘅聯想Call輪9659，收13.6仙，彈升36%，喺龍虎榜上排名第2。聯想（992）收2.575元，升3%。呢隻輪有一定值博率，因為有大把時間，12月夠鐘，行使價2.88元，正股未必冇機會見到此價（昨收2.575元）。溢價17.1%，槓桿率18.9倍，數據可接受，吼低入貨。
長實（001）收49元，升50仙，拉起隻Call輪9682，由3.5仙彈上4.6仙，升幅31%，龍虎榜上排名第3。隻輪下月中前到期，溢價13.2%，槓桿率106.5倍。正股若然個幾月內升13.2%，隻輪自然有得剩，不過相信機會微啲，隻輪最後會用嚟墊煲底。賭長實Call輪，其實好多可以揀，例如9837同9829。
章盛