張敏儀與其他九位對中大有貢獻嘅男士，獲中文大學頒授榮譽院士銜。張敏儀代表十位榮譽院士在頒授典禮上致謝辭，提到新聞自由、言論自由係香港最寶貴嘅資產，呢次沙士事件更凸顯香港資訊自由嘅寶貴。最近中大醫學院院長鍾尚志教授到FCC（外國記者會）參加沙士講座，也曾特別指出，香港嘅新聞自由，係對抗非典型肺炎嘅大功臣。
張敏儀話新聞自由就像空氣般重要。空氣最唔值錢，因為空氣嘅供應量無限大，無處不在，所以經濟學家老早就指出地球上最重要最寶貴嘅「貨品」就係空氣，但亦最唔值錢。新聞自由喺香港（直到目前為止，直至基本法二十三條立法為止）仍然係「供應」太多，好似唔值錢。但我哋必須小心保護清潔空氣，以免被人污染、搶走！
星期六早上（五月三十一日），寫稿之際，HBO播映一套不知名電影（因左丁山半途加入），睇咗幾十分鐘，都係講一個二次大戰時期德國將軍、律師、高官召開一個秘密會議。套電影就係等於會議紀錄，詳細描寫與會中人嘅辯論、心理狀態、內心恐懼、清洗猶太人嘅理據。嗰位將軍要假借合乎德國法理名義，「疏散」（evacuate）（實即「清除」eliminate）全歐洲猶太人，大家辯論不休，最後將軍靠嚇，威逼利誘，逐個擊破，蓋世太保魔影籠罩每人心中，卒之一致通過如何殺死晒猶太人。呢套電影講述真實故事，所有與會者最後全部冇好下場。問題係呢班聰明人點解墮落至此？皆因希特拉殺死咗新聞自由，所有壞事可以秘密地由秘密警察執行。冇新聞自由，生命也就冇保障。