日本本田車廠於日前公布咗四月份汽車製造、銷售及出口等數據，其中設於日本本土以外嘅海外生產線產量，錄得雙位數字升幅，實能令人感到鼓舞。
本田於四月份，喺位於日本國內嘅生產線，合共產製出83,873部新車，較2002年同期下跌26.2%；但設於海外嘅生產線則合共產製出154,014部新車，較去年同期上升多達18.2%，若以單一地區計算，亞洲區生產線嘅表現可謂最強勁，於四月份合共生產咗26,429部新車，較2002年同期升幅高達102.4%！銷售數字方面，則由於全球經濟表現疲弱，令人買車意欲大減，因而令本田於日本本土，響四月份嘅賣車數量只有45,993部，較去年同期下跌31.3%；同時，Fit（即港版Jazz）、Life及Mobilio仍然係廠方銷量最高車款。出口汽車數量亦只有41,511部，下跌3.5%，但出口往歐洲地區嘅汽車數量，則錄得119.1%嘅升幅，數量多達11,923部。