英國萬人迷碧咸（DavidBeckham）有幾出名就唔使多講，佢同老婆Victoria已經成為家喻戶曉嘅名字，我羅拉亦認為碧咸係全世界最著名嘅運動員——除咗美國！
話說碧咸同Victoria日前喺美國出席完頒獎典禮後，前日諗住喺洛杉磯shopping，佢哋喺成班保鑣護送下，去咗一間鞋舖睇波鞋，班保鑣重誇張到用架豪華房車封住條路。舖頭老闆話：「我聽到有啲騷動，望出去見到有架車封住條路，我真係俾佢哋嚇親。」
碧咸夫婦又要求老闆閂門，等佢哋可以好舒服咁睇鞋，但係老闆根本唔知佢兩個係乜水，班保鑣於是即刻解釋話佢哋好出名，點知呢位老闆好抵死咁回應：「喺英國或者係，但係呢度就肯定唔係。我亦都唔會為任何人閂門，Britney都成日嚟，佢都冇叫我閂門。」不過老闆最終亦被迫屈服，好唔願意咁掛咗個「暫停營業」牌喺門口，雖然碧咸夫婦睇咗一陣都買到啲嘢，但Victoria出嚟嗰陣，塊面已經黑晒！