信和牽頭發展嘅大角嘴柏景灣，上月底獲德國柏林舉辦嘅，第五十四屆房地產業聯合會頒發優良建築獎。據講負責評審呢個獎嘅評判，包括全球頂尖嘅建築同地產界專業人士，由物業外形、質素、美感、功能，同埋對附近環境帶嚟正面影響等作為評分標準。
柏景灣由五座住宅大廈組成，有三個面積共三十萬方呎嘅主題花園，會所超過十五萬方呎，並有一個八十萬方呎商場。個主題花園重係出自名園林設計師BeltCollins手筆。
好橋唔怕抄，難怪有二千一百個單位嘅將軍澳坑口站蔚藍灣畔，規模、設計藍本都沿用柏景灣嘅設計啦!第日開賣時又多個賣點嘞，個盤已經申請售樓紙，今年就可以推出。
新落成嘅中環遮打大廈，業主同管理公司置地公司，總承建商金門建築，同升降機供應商迅達升降機（香港）有限公司，攞到怡和集團嘅「PrideinPerformance」獎。雖然呢個係集團畀嘅獎，但各公司都落實「合作約章」，發揮合作精神，先至令到呢項總投資十九億嘅物業，可以提前完工。𠵱家遮打大廈商場部份已全部租出，寫字樓租出率都超過七成半。
今個月15號父親節，地鐵商場又有新優惠，當日喺九龍灣德福商場同青衣城商場，累積消費滿二千蚊（包括兩張過一百蚊或以上，不同店舖發票）嘅顧客，可換到兩張原價六百六嘅維港直升機觀光券，空中欣賞維港兩岸同青馬橋景色，名額一百個。
提起上水行樂戲院，相信唔少街坊特別係老一輩，會有好深印象，因為間戲院有成四十年歷史，98年結業重建做商場，下個月落成入伙嘞，名為行樂坊。大業主搵卓先測量師行做獨家代理。
聽卓先講，行樂坊喺石湖墟新康街六十七號，商場只有地下同一樓兩層，總樓面約萬八呎，地下有九個舖位，其中半層已畀大型連鎖超市集團租咗，其餘舖位面積由371呎起。一樓全層8909呎，計劃租畀一家飲食集團。舖位租金每呎二十到五十零蚊，租期一般兩至三年。
商場大業主係上水鄉紳張人龍（圖二左）家族，佢哋喺上水重有唔少舖位同住宅。
蘭西
電郵地址：