自從被揭發偷步買車後，阿松至今都冇運行，次次落區都俾市民冷嘲熱諷，就連佢老同學，𠵱家一齊服侍老董嘅廖秀冬局長都暗寸佢膚淺。事緣冬姑接受《文匯報》訪問講閱讀心得，話自己後生時鍾意睇瓊瑤、依達嘅愛情小說，𠵱家重四圍搵緊伊達本《蒙妮妲日記》。大個咗迷巴金同魯迅嘅作品，但係從來唔會完全接受某一個人嘅理論，好似最近好流行嘅美國文學，甚麼《誰動了我的奶酪》（《WhoMovedMyCheese》）、或《富爸爸，窮爸爸》（《RichDad,PoorDad》）等，佢就唔喜歡，亦都從來唔買。
冬姑指呢啲書將問題過份簡單化同樣板化，「書中提到的難題，無論如何也比不上香港目前所遭遇的經濟困境」，佢又話：「單說倒容易，做起來就困難。」所以佢頂多企喺書店「打書釘」揭完就算，唔去研究。
身為博士嘅冬姑，自然不屑研究呢啲平民化暢銷書內容，不過八方記得阿松上任之初，就曾經多次推薦《誰動了我的奶酪》，講到本書係應付新時代轉變嘅《聖經》咁滯，凡事一窩蜂嘅香港人重四出撲書，一時洛陽紙貴。
而冬姑近排就重溫《呂氏春秋》，話領悟到唔少治國之道，包括唔理外間點批評，只要經過深思熟慮認為係啱嘅，就去馬做得㗎啦，就好似對付沙士咁喎！
傳真︰2623-9278
電郵︰