近排車氣急升嘅福士，新車推出可謂一浪接一浪，繼早前新版嘅100匹Polo手波、Facelifted新版Beetle同辣味十足嘅GolfR32之後，上星期又有右軚「甲蟲」開篷車正式抵港，你哋都咪話唔厲害。
然而，據亞Mark打探所知，代理嘅攻勢似乎重未停止噃！皆因佢哋響較早前，經已秘密運嚟新版Bora1.8Turbo型號（馬力150匹），以抗衡一眾同級對手之餘，矛頭重直指同屬姐妹廠嘅奧迪A41.8T版；標準版定價都不過23萬上落，而追加咗包圍嘅GT特別版，賣價都不過係26萬之內，影響所及連帶相若規格嘅日本車，都備受不少壓力㗎！睇嚟今勻代理以呢款Bora1.8Turbo，入替原有Bora2.3型號，實在係明智之舉啦！