大官請食午飯，與左丁山撐枱腳，好彩佢係男人啫，假如唔係，佢屋企鳥語花香，近望高山碧翠，遠望海波盪漾，嗰場面羅曼蒂克到唔恨，兩個人坐在花園旁邊，如此親密接觸，好易惹人誤會。
大官話：「我以前住過半山區，企喺露台望出去，中環寫字樓大廈盡入眼簾，個view同辦公室差唔多，返到屋企與返工，好似冇乜分別，心情唔可以輕鬆起來。搬上山頂，空氣好潮濕，遇上微雨暗霧，成身懶洋洋，提不起勁，根本唔想返落中環。搬嚟搬去，都係南區好，我以前住喺淺水灣，天朗氣清之日，海洋一望無際，上空藍天白雲，都唔知幾爽，起身吸啖新鮮空氣，返工特別有勁！」
所以大官仍然喜愛南區，佢認為係豪宅首選區域。左丁山完全冇資格住半山名廈、山頂豪宅、南區獨立屋，不過自己聽吓都夠爽神，戥人高興吖嘛。人比人，比死人，千祈唔好比，想當年大官瞓帆布床讀書之時，左丁山瞓冷巷碌架床上格，彼此出身背景幾乎一樣，讀完書後，發展路向越嚟越變成南北兩極，好彩左丁山這些年來見慣闊佬，重可以維持定力，唔會眼紅人哋，否則入青山醫院都似。與大官食飯不談政治，毋須唇槍舌劍，食飯又幾輕鬆噃，不過想起大官身受嘅壓力，又覺得自己做慣乞兒懶做官，都幾幸福。