1、2、3、4隻綿羊……，呢期潮流唔止興揸綿羊仔；重有一種綿羊，唔理你喜歡與否，每晚喺你臨瞓前，都例必在你腦海出現，佢就係「一群等着你數的綿羊」！SARS、失業、經濟市道不景，令香港人失眠，真係有千百個理由！
記者：朱崇德
攝影：陳偉強、朱崇德
鳴謝：關嘉美醫生、羅曼生中醫
Model：Clara（環球文化）
醫學上來講，一個人在1個月內有2晚失眠，就會被稱為有失眠症狀，如在2周內有一半睡眠時間都有失眠，就可被定義為失眠症。失眠嘅主要症狀為夜晚難以入睡，而且好難可以熟睡，一晚會有好幾次醒來，又好早睡醒。
「睡眠基本可分為淺睡、深睡及眼球快速移動三個階段，每段時間大約需時60至90分鐘，當中尤以深睡最重要，因為這個階段人體腦電波會放到好慢，有助人體回復體力，如果睡眠質素高，3至5小時已經可以完成三個睡眠階段。」
所以一般失眠者，由於未能經歷深睡這個階段，所以在白天會經常性地昏昏欲睡。而且失眠會令人精神疲憊，注意力不能集中，導致工作效率降低。如果長期失眠，更有可能產生精神問題。
失眠Q＆A
就失眠問題，小記走到街頭作簡單民意調查，發現好多20至30歲打工一族，都間唔中有失眠問題，不過通常都唔會去睇醫生，因為佢哋都有自己一套失眠解救法，做得啱唔啱，不如大家睇吓醫生嘅意見：
YOYO 繼續瞓唔好理！
職業：餐廳侍應 年齡：19歲
醫生意見：
用平常心去面對失眠，安慰自己淺睡好過完全唔瞓，都不失為好方法，不過千祈唔好𤷪𤺧，愈怕失眠反而會更難入睡；數綿羊都唔係好方法，數嚟數去都瞓唔着，反而可能搞到你有精神病！
旺角Twins聽啲輕音樂。
職業：學生
年齡：17及16歲
醫生意見：
亦係令人好輕鬆嘅方法，可以一試。
阿生 飲杯熱飲或熱奶！
職業：學生 年齡：20歲
醫生意見：
飲杯熱奶或熱飲，都可以達到鬆弛神經效果，可以令人更快入睡。
小魚 食2粒安眠藥咪得囉！
職業：文員
年齡：21歲
醫生意見：
在未有醫生處方兼未知失眠原因下自服安眠藥，係治標不治本方法，如果係精神病導致失眠，可能會令精神病進一步惡化！
阿添 睇本最悶嘅書，即刻瞓着！
職業：電腦從業員
年齡：23歲
醫生意見：
都OK啦！不過唔好睇一啲太富挑戰性嘅書；如果你是一個愛動腦筋的人，可能適得其反。
Jenny 飲杯酒會好瞓啲！
職業：餐廳侍應
年齡：19歲
醫生意見：
醫生唔會建議大家用呢種方法，如果長期失眠又長期飲酒，可能會令你有酗酒問題！
洪仔 咁咪唔瞓住，聽日瞓番補數囉！
職業：待業
年齡：20歲
醫生意見：
一定唔可以！咁會令人嘅日夜生理時鐘顛倒，嚴重者會令失眠問題惡化！
阿Dick 浸個熱水浴，一定瞓得着！
職業：經理
年齡：29歲
醫生意見：
浸浴可以令人精神放鬆，可以好快入睡。
西醫
其實平時應該要建立好良好睡眠習慣，千祈唔好養成日頭瞓覺嘅習慣，一定要入夜先瞓，否則會影響人嘅生理時鐘；另外日頭時間做適量運動，再加晚間少飲用咖啡一類刺激性飲品，都有助安睡；如果是因壓力問題導致失眠，應該要找出壓力來源，並將之解決，自然唔會再有失眠問題，如果問題嚴重者，應該找醫生醫治。
中醫
中藥一樣有專治失眠的處方，不過就將之定名為「不寐」。造成不寐的原因可以很多，不過精神壓力大，亦是主要成因之一，有30多年中醫經驗的羅曼生中醫師表示，這類病應以寧神、定志及養心血三方面着手。
不過構成不寐原因有很多，病情嚴重者宜找註冊中醫師作臨床診治斷症，找出病源！
酸杏仁6錢
黑靈芝6錢
浮小麥7錢
茯神7錢
紅棗7錢
燈芯花10個
栢子仁4錢
遠志3錢
圓肉4錢
石菖蒲2錢
製法：5碗水煲成1碗水
註：劑量只適合年輕人，老年人不適用。