美股上周五咁勁，港股昨日彈升自然好多人都估中。恒指收9637，升150點，而期指則升101點，雖然都重係高水19點，但都可能代表個市要透透氣。升得急嘅藍籌股，最好避吓，揀啲落後藍籌望吓，然後搵相關Call輪埋手。
滙豐（005）是日冇郁到，收93元，到咁上下，滙豐又會俾人話落後，踢番高些少。揀滙豐Call輪落手，對象係9631同9763。9631今年8月夠鐘，現價31仙，溢價3.2%，槓桿率30倍，呢件槓桿率好勁，所以有一定溢價。9763今年9月夠鐘，現價63仙，溢價1.4%，槓桿率14.8倍，呢件吸引力在於槓桿率唔細，而溢價則又唔高。滙豐波幅通常較其他藍籌細，但股價只要郁一兩蚊，啲Call輪波幅都幾可觀。
恒生（011）收83.50元，亦只係郁得有限，升50仙，有機會跟番大隊做番好啲，昅住Call輪9654，隻輪下月底夠鐘，現價9.8仙，溢價5.2%，槓桿率85倍。當心呢件風險好高，係價外輪，行使價86.88元，正股升唔夠3.4元以上，則隻輪最後只能用嚟墊煲底，所以注碼千祈千祈要克制。
中石化（386）繼續有4仙進帳，早幾日所提嘅Call輪9379升18%，收19.4仙，8月到期，負溢價2.1%，槓桿率8.8倍，仍然抵買，不過最好等正股回吐時先考慮。
章盛