AC副會長加里安尼日前話因為贊助商關係唔可以簽碧咸，呢番話都幾有啟發性。受千絲萬縷嘅商業因素影響，碧咸選擇可能真係唔多。唔怪得最近傳得最盛係佢會過檔巴塞，無他嘅，因為冇商業衝突嘛。
據加里安尼講，AC本來都諗過出手買碧咸，弊在碧咸自己同Vodafone電訊有兩年約在身，而Vodafone商場大敵Siemens正正係AC贊助商之一，所以好為難。除咗AC外，Siemens亦都贊助皇家馬德里，碧咸都唔易過檔。
考慮到呢點，我求大俠終於明白點解英國佬猛咁吹碧咸會加盟巴塞，因為巴塞冇大電訊公司贊助。空穴來風，未必無因。不過事情未明朗化，我求大俠暫時唔想表態，一於擔定櫈仔慢慢睇呢齣「萬人迷去向之謎」。
日本嚟緊會同阿根廷、巴拉圭踢麒麟盃，到時喺歐洲搵食球員都會歸隊。不過，中田英壽等今年體力付出會好大，麒麟盃前幫球會踢友賽，中村俊輔踢護級附加賽；之後有洲際國家盃，踏入七月中就開始球會季前集訓，相信佢哋只有三個禮拜時間係真正休息。如果薛高唔錫住佢哋，真係踢殘！
前晚荷蘭盃決賽個個都話爆大冷，梗係啦！淨係識捧強隊飛燕諾，決賽波都好少強弱懸殊，我哋國際擂台榜首三位名家青蛙仔、吾中及蘋果波神，都提晒大家要捧烏德勒支！所以爆冷都難唔到我哋班名家！不過烏德勒支捧盃成功，多少都有賴球證嘅「支持」，唔知個球證係咪都鍾意鋤強扶弱呢？
效力上海申花嘅德國中場艾拔斯，最近對啲過氣球星，唔肯投身中國球壇有獨特見解，唔係因為「沙士」同甲A水準低，係球會醫療技術同設備不足所致，驚住傷咗醫唔番。我求大俠就覺得，有時中醫對治療運動創傷係有一定功效，只不過西方球員未必合適啫，佢咁講未免太武斷。
同爵士約滿嘅NBA老將馬龍，接受訪問嗰陣大放風聲，話來季想投效嘅球隊唔係好多，早前季後賽出局嘅小馬係首選。馬龍就快四張，講到明玩多兩年，為此佢好希望可以一償攞冠軍指環心願。其實年輕嘅小馬都好需要馬龍嘅經驗同場上領袖才能，既然各有所求，雙方來季真係合作一啲都唔奇。