林子祥失足墮下八呎升降台機關，傷勢理應不輕，但原來阿Lam墮下之際，剛好撞在汪明荃身上，阿姐為阿Lam承受了部份衝力，才不致重傷。而阿Lam太太葉蒨文昨日在醫院召開記者會，透露阿Lam今可嘗試下床活動。
林子祥日前為汪明荃演唱會擔任嘉賓時，不慎失足跌落八呎深的升降台機關，即時被送往法國醫院急救，經過多位名醫連日來的診治後，阿Lam情況已好轉。不過，阿Lam今次之所以能夠逃出鬼門關，原來是拜阿姐所賜，據悉阿Lam跌落機關的一剎那，阿姐正在升降台附近準備出場，當阿Lam墮下時，因為撞到阿姐，阿姐承受了部份衝力，阿Lam才墮在地上，故此傷勢不致那麼嚴重。
記者昨日致電阿姐求證，她承認阿Lam墮下時的確是撞在她身上，阿姐說：「係呀，我成隻右手瘀晒！如果佢撞到我個頭，大家情況都會好危險㗎！」那麼阿姐豈非變成了阿Lam的救命恩人？對此阿姐笑說：「唔好咁講，我𠵱家隻手重好痛，惟有自己喺屋企搽跌打酒囉！」
而葉蒨文昨晚在阿姐的陪同下，在醫院召開記者會，葉蒨文說：「阿Lam受傷係頭落地先，佢尾龍骨右邊有少少裂痕，右耳上頭殼有一道傷痕，最初醫生發現佢腦部有出血情況，入院第二日瘀血增大咗一倍，腦部又有移位，醫生話有需要就要開刀。但經過幾日觀察，醫生今日話瘀血冇再增大，腦部亦返回原位。阿Lam臉部冇傷痕，佢瞓咗幾日，臉色紅潤，重青靚白淨咗。」
葉蒨文續說：「阿Lam暫時聽嘢有少少困難，但要時間康復。我唔擔心佢有後遺症，應可以回復正常，下次重可以再做阿姐演唱會嘉賓。」
問到阿Lam的保險賠償問題，葉蒨文說：「我同阿Lam都冇買保險，但唔緊要，我冇怪任何人，張生（張耀榮）話會負擔住院費，最緊要我老公返屋企食飯。」葉蒨文表示醫生建議阿Lam今天可以嘗試下床活動一下。
阿姐強調阿Lam叮囑她要澄清，她說：「佢話呢件事唔關阿倫事，我嗰晚太黑，都唔知阿Lam跌咗落嚟，阿Lam演出前冇拎利是，我去醫院都即刻畀番利是佢。」
採訪：戴彩煥、何永寧
攝影：何國豪
