謝霆鋒噚日以一身未來戰士扮相，喺西貢拍攝特步波鞋廣告，霆鋒重吊威吔做咗幾個旋轉同凌空踢腳嘅動作。據知廣告會喺內地多個省市播放，宣傳費高達一億元。
霆鋒話啲衫比較貼身，所以唔可以加保護衣物，問佢會唔會擔心傷到重要部位？佢即時笑話：「你哋係唔係話小弟個小弟呀，希望唔會整親啦。」經理人霍紋希就話已經幫霆鋒買咗過千萬保險。
記者問霆鋒有冇保險公司接受佢嘅汽車投保？佢話：「咁都有啲好大方嘅公司，事實上佢哋都係想我做一啲善事，不過喺未成事之前我唔想講住，總之我希望大家遲啲會見到。」
黃泆潼一向畀人性感嘅感覺，成日着低腰褲，露出小蠻腰，噚日佢喺將軍澳電視廣播城，雖然只係着中腰褲開工，但露腰嘅習慣依然冇變。原來最近有醫學報告指出，女性不宜成日着貼身低腰褲，因為咁樣會影響盆骨，同埋容易引致膀胱炎，所以黃泆潼為健康起見，已經減少着低腰褲。
周麗淇噚日到元朗，拍攝RoadShow嘅《香港樂悠遊》，佢話：「我好多時都入元朗食嘢，我有朋友住喺度，加上我又鍾意周圍搵嘢食，我爸爸媽媽間中都會嚟呢度嘅大榮華飲茶，食最出名嘅豬油撈飯，媽咪就一定會買老婆餅。」提到最近接拍嘅無綫新劇，周麗淇話：「好開心可以同劉松仁合作，媽咪當佢偶像。」
韋綺姍噚日以代言人身份，到灣仔拍攝「PureBeauty」纖體廣告。原來韋綺姍以前一直都唔信雜誌上嘅纖體廣告，直至佢喺六個禮拜內，由一百四十磅減到一百一十幾磅，佢先至信。佢話生完兩個女之後都唔知點去收身，老公都有話佢係肥婆一名，所以好開心今次瘦身成功，不過佢老公叫佢千祈唔好減咗啲重要部位。
張國榮逝世都已經兩個月，噚日韓國有三百名fans幫佢喺漢城如來寺搞個「四十九齋」法會，祈願佢能夠早日魂歸九天。聽講原本有兩萬多個登記咗嘅fans想參加，但合資格嘅得三百人。現場所見，個個都着黑色衫，手持白菊跪喺度祈禱，更加有人遮面痛哭，氣氛好哀傷。
黃德如同鍾景輝Kingsir噚日到尖沙嘴，出席無綫節目《中華狀元紅》記者會。黃德如笑話無綫三顧草廬，先可以打動Kingsir拍佢做主持。而無綫高層何麗全就話已經透過睇帶，揀咗六位港姐海外佳麗，而港姐決賽嘅舞台設計，雖然有好多機關，但只要啲佳麗綵排多啲，應該唔會有事。
