美股造好，港股唔執輸，恒指大升150點，收報9637，但成交只得76.71億元。世衞撤銷本港旅遊警告，政府忙於一連串振興經濟活動，香港旅遊界亦忙於接待廣東旅行團，但市場似乎憂慮香港持續出現零星的SARS感染個案，令去除疫區之名仍遙遙無期，阿松同一班高官係咪開心得太早呢？
噚日電訊股帶動大市上升，聯通（762）勁升6%。據聞聯通會重鎚出擊搶客，達致CDMA全年新上客目標1140萬戶。睇嚟聯通及中移動（941）都存在唔少不明朗因素，升勢難以持續。Cookie話，聯通新優惠主要涉及推出低價CDMA手機，不涉及大額補貼，所以對聯通之負面影響唔算好大，最多都係搶番本身嘅GSM客，反而中移動會頭痕啲。
信佳（912）先舊後新配售2000萬股，每股1.40元，集資2800萬元。配售價折讓幅度唔算大，只有5.4%咁大把，但據聞認購反應唔錯。信佳主要幫網絡設備供應商生產網絡設備產品，中期盈利倍增至2683萬元，兼獲得本地知名基金ValuePartner入股5%。信佳一向貨疏，但就有唔少基金對佢有興趣，今次配售聽聞獲唔少基金客捧場。
「上海首富」周正毅又爆出被調查消息，今次重涉及到國內執法機關要求廉署採取搜查行動，睇嚟上海地產（067）及上海商貿（1104）有排都唔使復牌。呢件事連累到上海策略置地（164）亦俾人沽到暈，全日勁挫26%，成交476萬元。黑客話，上海策略其實同周正毅冇乜關係，連幕後都唔係同一路人馬，但因為散戶怕咗上海股仔要沽貨，而幕後卻缺水維持秩序，所以噚日先至失控插水。
阿虎