又有一間老牌酒樓執笠，年輕賓架亦話，融資界傳出漢寶（228）同埋金龍船（318）隻殼有得傾。
家陣做酒樓或者飲食行業，確實好艱難。上述兩隻飲食股上市以來，業績表現倒退係有目共睹，早排兩股重先後出過通告，講明生意受SARS打擊。
小初記得，金龍船同漢寶上市時間相差唔太遠，前者都叫做炒過一段短時間，所以能夠在後期頻頻玩回購，兼夾5合1併股。
至於後者就好難理解，皆因炒都未炒過。年輕賓架話，當日漢寶上市時，大檸檬出過唔少力，究竟中間發生乜嘢事？至今好多人都唔明。
另外，呢排惠理基金似乎變咗金手指，所沾手嘅股票都會升，好似中意控股（1198）同理文手袋（746）咁，就真係升個唔停。以小初嘅愚見，就覺得理文手袋再升機會較高，皆因現價距離芬佬入股價仍有距離，而且成交唔算大，未有出貨迹象。
慕容小初