唔少人為咗玩影相走去換手機，其實冇鏡頭嘅手機亦可以玩，因為可以用外置鏡頭插落部手機度，早幾日又有隻新鏡頭仔登場，呢款由香港生產嘅CamQ，係畀三星嘅T400同T500系列用，但只可以影8張相左右，過相入機又要熄機再開，都幾麻煩，不過$490就可以玩吓影相，總好過拎幾千蚊換機。
查詢：鉑匯科技（23987320）
SonyEricsson部T610近嚟的確勁，唔少手機舖淨係Show個機殼賣，好多舖仔已經冇乜存貨，同舖頭老闆傾開原來有人大手掃貨，不過今次就唔係掃番去內地市場，而係掃去歐洲，因為近期歐羅升值，相對之下香港個價就抵好多，吸引到唔少人走貨去歐洲，今次真係風水輪流轉。
又係三星嘅料，部扭擰王V200C早幾日終於都有中文版本，不過當然唔係原廠中文行貨啦，只係有高手將佢改成中文版本，好唔好賣暫時就未知，不過即時反應就係英文版價錢由$2,900升至約$3,100，因為好多舖頭都搶購英文機用嚟改中文，中文版賣價就約$3,750。用緊英文版嘅用家就要等吓㖭，因為淨係改落舖啲機都有排改，暫時都唔會接散改Order住。
文：羅新基