講過N次第N屆都唔會做特首嘅行會成員梁振英，近日又被傳係下任特首大熱，佢老哥例牌否認，但空穴來風必有因，消息人士話係港澳辦幕後提點所致，故此CY梁近排頻頻曝光，更罕有地落區去淘大E座視察污水渠，擺出親民姿態，比起好多問責局長重落力，當中要傳達乜訊息，畫公仔唔使畫出腸嘞啩！
若然振英哥真係得到港澳辦「祝福」，跑出機會係咪大啲呢？八方唔敢妄下判斷，不過睇返往績，老董當年亦係由港澳辦捧起，結果係點，唔使多講矣。
《蘋果》早排搵中大做過一次下任特首誰屬民調，一般讀者只係留意到煲呔曾蔭權民望第一，其實振英哥都榜上有名，不過五個人入面佢排名尾二，阿爺點睇重係未知之數。
傳真︰2623-9278
電郵︰