AC米蘭四日內捧兩個盃，膺盃賽「雙料冠軍」重唔威過威士忌？佢哋前日對羅馬場波氣氛好正唔在講，好多球員都履行贏歐冠盃就紋身嘅承諾，喺手臂度紋上冠軍字樣，惟獨教練安察洛堤無履行染髮承諾，不過相信無人會介意呢個小節囉。
七萬幾人喺聖西路球場見證隊波威威，當班球員捧完意大利盃離場後，球迷都唔願走，好似聽完演唱會等「安哥」咁。果然班球員離場無耐又陸續行返出嚟，隊長馬甸尼帶埋個仔捧住歐冠盃出場，即刻搞到全場球迷陷入瘋狂狀態。咁識搞氣氛，財雄勢大嘅球會真係唔同啲。
講開呢場意大利盃決賽，羅馬又有托迪同卡斯辛奴兩件攞紅牌出場，教練卡比路又扯晒火大鬧球證水準差。睇番統計，羅馬係今季意甲最茅球隊，淨係聯賽都攞九面紅牌，所以我求大俠覺得羅馬場上紀律真係有問題。佢哋隊波下季想發圍嘅話，球場紀律同埋攔截方面要先改善。
超聯雖到八月先開番，但有中國外援孫繼海嘅曼城就賣晒季票，有兩成半係畀華人掃咗。我求大俠知老孫有同胞支持都覺得開心，但亦覺得悲哀，事關曼城擺明用老孫嚟賺中國人錢。老孫季尾喺曼城冇得打，希望佢下屆可爭番正選，同證明中國球員唔係超聯球會搵錢工具，係有實力喺超聯立足。
負債近二千七百萬鎊嘅超聯降班隊新特蘭，諗住以四百萬鎊放走早幾年值千一萬鎊嘅菲臘斯，點知冇球會要，於是就減至二百萬鎊；聽聞米杜士堡同熱刺就爭緊佢。菲臘斯就快三十歲，但既然佢之前攞到超聯神射手，實力唔會差，邊間球會如果可以二百萬鎊買到佢，肯定係今夏其中一單最抵收購。
噚日騎士搵咗史拉斯做教練，同日活塞教練卡里斯利突然被炒魷，而且更盛傳之前話可能過檔火箭嘅前76人教練布朗，已經同活塞傾掂數過檔。之後又傳拓荒者想飛起教練卓斯，搵卡里斯利取而代之。不過卓斯亦都唔使憂，皆因76人之前話想搵佢頂布朗個位，咁搞法今年NBA教練市場重亂過亂世佳人！