踏入六月，唔經唔覺已經到咗○三年第二季尾，回想過去兩個幾月全港市民一起走過嘅抗炎（非典型肺炎）日子，真係有悲有喜、有笑有淚，百般滋味在心頭。
唔少社會服務團體啲無冕天使同大使講，前排因為怕咗沙士，各類型社區服務計劃、聚會同探訪活動都被迫停辦，我哋蘋果基金打正旗號去幫手，又點停得手？不幸中招嘅「沙士」家庭、受「沙士」影響以致失業、放無薪假等等嘅求助個案一個接一個，搞到我哋啲愛心大使應接不暇，各位惟有忍耐一下，我哋會盡力㗎嘞。
近日社會福利界已經恢復活動，呢排服務長者團體中最In（應景）嘅活動，就係向窮苦無依長者送贈愛心糭子。今年我哋收到二十幾間非牟利社會服務機構申請合共超過一萬五千隻愛心糭子，需求甚殷，好彩募捐愛心糭子行動展開以來，不斷獲讀者迴響，有善長一筆過捐款一萬元訂購愛心糭子送贈新界區獨居老人，更有善長捐出一千三百幾份禮物包（內有糭子同甜橙各一），分贈予觀塘、何文田同深水埗等舊區嘅弱老，好讓佢哋喺『疫』境過後嘅端午佳節得嘗一口美味糭子。讀者一份關愛社會上孤苦長者之情，大使僅代表一眾長者講句多謝。
「蘋果愛心糭子2003專戶」捐款編號：C0555
暖流熱線
電話：29908688
傳真：23702192
電郵：
網址：