由八位理工大學男生組成嘅騎呢組合Aunties，舊年成班人柴娃娃組隊，扮九餅Cookies大唱《心急人上》，八支公重一齊着住白恤衫白短褲，喺沙灘上踢沙拍MV，個個睇完都笑到肚痛。
Aunties扮Cookies扮出名堂，估唔到佢哋因為咁而遇上伯樂，當年簽咗Beyond嘅Kinn's唱片公司，覺得香港近來死氣沉沉，希望帶一啲歡樂畀大家，所以早排簽咗Aunties，重同佢哋錄咗首新歌《扮晒嘢》，預計下月推出EP。
Aunties嘅八位成員，位位古靈精怪，包括吔媽爹（Yamade）、八神、賤佬、民宿、失憶、Lock、Five同BB仔，而佢哋首《扮晒嘢》內容諷刺時弊，歌詞中嘅「扮嘢新貴，有晒姿勢，靠撞膊撞到登晒報先威」，就擺明寸余文樂同陳冠希（Edison）嘅撞膊事件，真係夠晒抵死。
李惠敏噚日同黃震宇、麥玲玲等一班堪輿學家、有線《怪談》主持關寶慧及施明，喺鯉魚門天后廟參加放生儀式，為香港人祈福。
儀式完咗之後，李惠敏即要黃震宇師傅贈佢兩句，黃師傅話李惠敏個對象會係大大件嗰種，生肖最好屬虎、狗、豬或者馬，重話李惠敏嘅姻緣喺上年已經到咗，下年重好有機會結婚㖭，咁馮仁昭就要恭喜吓佢喇！
商業電台營運總裁蔡東豪同女友Wendy拉埋天窗，噚日晏晝喺中環國際金融中心同商界嘅朋友食飯，夜晚就喺淺水灣影灣園嘅花園搞咗個酒會，重擺咗。
唐寧噚日去大埔出席一個戶外活動，佢着短裙仔到場，洋溢夏日色彩。唐寧見到現場有啲車安排佢哋四出尋寶宣傳，佢話：「我上年考到車牌，我揸車都好安全㗎，遲啲我重想考埋綿羊仔嘅車牌，但又擔心自己技術唔好。」
劉家良同劉家輝兩兄弟，日前齊齊接受港台《舊日的足跡》訪問。問劉家良如果開拍新戲，會搵邊個新人演出？佢好坦白咁話：「我唔知，冇睇過。」但劉家良大讚張栢芝，話同栢芝好投契，又話佢好乖女、好孝順。當提到謝霆鋒，劉家良就話：「我知道謝霆鋒唔會弱㗎，佢有佢老竇嘅影子。」
鄧健泓噚日去藍灣半島出席捐血活動，問佢捐咗血未？佢話：「未呀，有啲感冒，我隻手三個月前生咗個肉粒，噚晚忍唔住刮甩佢，粒肉我就收埋咗。」
鄧健泓無喇喇多笪瘌，問佢覺唔覺得有啲唔衞生？佢話：「所以我咪搵火酒消毒同埋貼咗膠布囉！」
