飛魚王子方力申跳上水面做歌手，給人的印象是個陽光大男孩，但原來小時候的他很調皮，可說是「丁蟹」的化身。雖然，他不至於像丁蟹般推自己兒子落街，但由碌架床的上格推細佬落地，亦十分嚇人。
方力申（Alex）的父親因為有個善於游泳的大仔，和能言善辯、口才一流的細仔而感到十分自豪。Alex和細佬William精靈乖巧，但兩人童年時十分多嘴，Alex日前說：「我啲親戚成日同阿爸講『方生，你兩個仔好嘈呀』。」
憶述童年往事，Alex自然想起與弟弟一同成長的日子，他說：「屋企得我哋兩個細路，由細到大我同細佬嘅感情都好好㗎！睇吓佢小時候個樣幾咁得意，我哋年紀相差四年，有時都會玩到打交。」
Alex提起這段往事時不禁冒汗，他說：「記得我七歲時，同細佬喺張碌架床嘅上格度玩，本來玩得好哋哋，點知玩得太激，唔小心一推……我將佢由上格床推咗落地下。細佬當時喊得好犀利，好彩冇流血，只係塊面瘀晒啫。Touchwood好彩佢冇跌死咋，如果唔係媽咪就會又打又鬧。」
風水輪流轉，大哥差點「謀殺」了細佬，細佬William亦有不少機會報仇，Alex說：「我十歲時，有日同細佬喺屋企打機，點知佢突然發我脾氣，重用把半吋厚嘅間尺劈落我個頭度。」
Alex續說：「當時我覺得好痛㗎，劈到個頭流血，好彩流血唔多。我都未鬧佢，點知佢已經驚到話『哥哥，對唔住呀﹗』然後用把間尺敲落自己個頭度，睇到佢咁做，我個心重痛。」
採訪：王連連
