政府推出三十五億元貸款基金，果然不出山人所料，反應甚差，葉澍堃話直至上星期一為止，只收到申請咗一億一千八百萬元貸款，以比例計，實際上就係失敗到極。
點解會有錢冇人借呢？一早話過，要九成股東（股權）擔保上身，搵鬼去擔保咩！餐廳嗰班股東全部耍手擰頭，就係一個例子。呢晚食飯時間，在會所內碰到兩位賓架M嘅手下，賓架M係主管，佢嘅手下先至係日日與貸款客戶接觸之人，左丁山問手下A：「點解葉澍堃話好少人借錢呢？政府推出計劃之前，有冇徵詢你哋意見？」
手下A左望右望，知道冇乜其他人之後，先至細細聲講：「有搵我哋老闆去開會傾，老闆赴會之前，先同我哋傾。但係政府嘅計劃與實際環境差一截，我哋話明唔多掂，政府照樣推出，有乜計喎！佢哋啲高官邊度識做貸款㗎！」
手下B話：「老闆係經濟動物，人人識計數。上個月唔掂之時，點肯借錢嚟出糧呀，第一招就係炒人，第二招係放無薪假期，第三招係減薪，三招做完，根本已經冇乜薪酬負擔，如果咁都要借，不如執咗盤生意啦，費事自己與股東上身吖嘛。」睇嚟真係去借嘅公司，另有苦衷，或者老闆真係「鐵肩擔道義」，值得尊敬。不過聽賓架M啲手下講完，政府真係有啲閉門造車，漠視前線人員嘅意見。呢，𠵱家要修改計劃嘞，幾嘥精力呢！