手袋黨前日喺港大重聚，噚日陳方安生偕老公又同李麗娟入馬場睇遮打盃大賽。有人話，「手袋黨」一詞係咪已經out咗？out唔out八方唔知，不過就知道好多人重懷念手袋黨當權嘅日子；可能畀董特首知道，又會鬧大家唔夠「與時並進」。
陳太同李麗娟噚日咁好興致入馬場，原來係應馬會主席夏佳理嘅邀請，同行嘅重包括王䓪鳴。原來呢排手袋黨真係頻頻聚會，前兩日佢哋就約埋王䓪鳴、李鵬飛等人為杜葉錫恩預祝九十歲生日。
原來自從杜太十年前八十歲生日，陳太佢哋呢班朋友已經開始每年同呢位政壇長春樹開生日會慶祝，風雨不改。今年啱好第十年，大家重夾份送咗份名貴嘅生日禮物畀杜太──琉璃工房嘅琉璃精品。
講番跑馬，李麗娟就話自己冇賭癮，但每年總有幾日由朝賭到黑，就係一年一次去加拿大探媽咪。由於李老太最大娛樂就係打牌，女兒去探佢，唯一節目亦係陪阿媽打麻雀。李麗娟話自己次次都一定輸，因為自己一落機就打牌，邊夠以逸待勞嘅媽咪打？八方就覺得佢係故意蝕章博老人家開心，真係識做。
傳真︰2623-9278
電郵︰
