對於佐敦（Jordan）呢個巨胸名模，我羅拉真係冇乜嘢好講，自己個仔夏菲（Harvey）已經不幸失明，最近重話有糖尿病兼腎衰竭，但係佐敦唔單止唔理個仔，竟然重話計劃再次隆胸，諗住將個胸整到好似籃球咁大，唔通重嫌自己負擔唔夠重？
如果佐敦真係講得出做得到嘅話，佢今年年底就會去紐約接受第四次隆胸手術。佐敦𠵱家上圍已經係32FF，真係唔知到時變咗乜嘢size，不過佐敦話愈大愈好喎，事關佢認為咁樣對佢嘅模特兒事業有幫助，喺娛樂圈可以企得耐啲咁話。
可惜除咗佐敦自己之外，佢個二十歲有錢仔男友同班friend都唔多贊成呢個做法，認為佐敦再咁落去，遲早變成一個怪胸畸形人，連最初傳聞幫佐敦做過兩次隆胸手術、兼替佢阿媽同細妹整容嘅醫生都唔敢操刀，所以先要幫襯一位紐約醫生！
講開佐敦，最近佢又喺英國一個名為「最想困邊個喺地牢」嘅選舉入面眾望所歸成為冠軍，打低第二位嘅貝理雅同第四位嘅喬治布殊，睇嚟唔少英國人都唔想見到佢哋！而盛傳同Blue成員Simon搭上嘅EmmaBunton，以及嘉芙蓮薛達鍾絲（CatherineZeta-Jones）亦榜上有名。