八方之前寫過司局長嘅新聞秘書申請食「瘦鴿餐」，其實有成三十八位新聞主任申請咗自願退休，佔總人數約一成，都唔好話唔多。聽講其中有成五、六個係總新聞主任，即係CIO。嘩，咁多有經驗嘅人要走，得唔得㗎？知情人士話，冇乜大問題，所謂「有人辭官歸故里，有人漏夜趕科場」。原來為咗削減開支，多個駐海外包括東京同多倫多嘅總新聞主任都要降由首席新聞主任PIO擔當，即係話有人要回朝，咁有人要退，咪剛啱好囉。
當然，一切要等埋新聞處副處長陳任慧芬放完假返嚟，同處長蔡瑩璧齊齊開會，決定究竟批幾多人走。
最後補多句，就係律政司司長梁愛詩唔係佛教徒，佢係信天主教嘅，重有佢嘅新聞秘書Joe張一直都熱愛工作，未有諗過申請自願退休。
傳真︰2623-9278
電郵︰