上周五美股氣勢強勁，國內又話月底會公布零關稅利港商措施，港股今早好難唔高開。個市若開得太高，追貨可能唔化算，開得唔太高，可以博吓。開得高則等回落少少先至諗買貨，不過相信唔易回得太多。
地產股先排拋售得過殘，近期開始似番樣，長實（001）等領導地產股啲Call輪，睇位吸納。長實Call輪揀9829，11月到期，現價61仙，溢價7.6%，槓桿率7.8倍。新地Call輪揀9779，9月到期，現價17.8仙，溢價12.5%，槓桿率21.9倍。恒地Call輪揀9787，現價27.5仙，溢價7.7%，槓桿率8倍。新世界（017）俾人踢出恒指成份股後，似轉強勢，但只能吼正股，冇Call輪買賣。
港交所（388）早前派半年成績後碌落嚟，跟住大市總成交好啲，股價生性番，有隻Call輪幾抵吓，就係9537，下月中到期，現價14.4仙，溢價0.2%，槓桿率7.2倍，細注無妨，大注買賣驚住轉身唔太易。
華創Call輪9595今年2月做1元過外，𠵱家3.3仙，稍後1仙求售都冇人要，因為行使價8.28元，正股（291）做緊6.50元，恐怕難以喺到期日前升到8.28元。8月底到期，時間不利隻輪。玩華創Call輪，始終係9270做主角，真係冇得你揀。
章盛