上個月21號美聯開股東會，其中發行紅利認股權證嘅議案，竟然遭否決，究竟點解會咁嘅？當日有份出席股東會嘅中原集團主席施永青，就為大家解開咗呢個謎團。
老施打破常規，上個禮拜喺中原網頁「老施周記」，一連三日刊登佢出席美聯股東會嘅所見所聞，最後一篇就爆咗呢個秘密。老施話當日由執行董事葉潔儀主持股東會，喺表決派發紅利認股證時，葉小姐問完有邊個支持後，好順口咁即刻就問有邊個反對，以為議案過梗，點知結果係一票贊成兩票反對。
既然舉手方式唔通過議案，通常做法就改為計持股量，因為有大股東嘅股份，可以扭轉局面，一定贏硬過關，但點算之下，又再失敗。因為支持票有一千萬股，反對就有一億零二百幾萬股。老施估美聯主席黃建業所持嘅逾兩億股，因為冇簽授權書畀人，佢又冇出席股東會，所以先至唔用得，搞到議案遭否決。
蘭西最有興趣想知係邊個基金，手揸住咁多美記股票，足足有成億幾股。
因為長實執行董事趙國雄露口風，上周引起傳媒追訪嘅發展商飯局，搞到有發展商要高調向傳媒澄清，唔係傾賣樓共識。
蘭西噚日見到飯局主角之一嘅趙生，自然繼續問，佢話，對行家嘅反應，可以做嘅係贈佢哋三國演義嘅「一壺濁酒喜相逢，古今多少事，都付笑談中」。佢彈句古詩出嚟，意思即係覺得呢單嘢冇乜大不了啫。
就有發展商對呢次飯局俾外界知道有微言，趙生答得重妙，佢話啲飯餸幾好呀，答非所問。
新地深明港人對住屋嘅口味同要求，但「各處鄉村各處例」，建築總監李國華講，公司喺發展內地首個大型住宅樓盤中山奕翠園時，專登派內地同事嚟香港受訓，等佢哋喺建築技術、規格如測試天台同窗戶滲漏等，都可以跟足香港標準，重要有埋交樓檢驗隊伍㖭。
個盤將會由旗下康業服務管理，日前特別為業主搞嘉年華。康業董事總經理鄺正煒話，引入港式管理同提供環保設施唔難，最難係要了解內地客嘅要求，佢希望今次活動可以深入了解佢哋嘅需要，亦借此加深買家對新地同康業嘅認識。鄺生重作咗首歌「情傾奕翠」，兼錄埋CD送畀啲客。
和黃青衣藍澄灣來勢洶洶，中環華人行開放示範單位後，連日嚟場面都好熱鬧，蘭西噚日見到中原陳永傑，傾完一輪後，佢爆料話同恒基當勞張（張炳強）約咗喺附近嘅茶餐廳飲下午茶，跟住帶一眾行家去偶遇佢。
原來陳永傑係帶啲市場成交資料畀當勞。睇嚟當勞對行家嘅軍情都好留意，準備隨時推出新招迎戰。但對於恒基嘅樓盤情況，就唔肯回應。傾開藍澄灣時，當勞就話，近日畢打街嘅擦鞋檔唔見晒，好擔心佢哋嘅生意。
樓市近期好番啲，發展商同代理即刻大搞活動，希望個市再旺啲，連一向較靜嘅禮拜一，都有八個記者會，認真誇張。其中兩單係中美開分行，地點不約而同都係喺大角嘴奧海城二期商場。
美聯分行喺十二點開張，中原分行就兩點，商場大業主信和都好識做，營業部副總經理韓家輝兩場都出席做嘉賓，九龍倉助理董事黃光耀都會嚟賀埋一份，原來九倉同中記上晝有個鑽石山星河明居獨家委任記者會，黃生就順道去埋中記分行開幕禮，畀面畀面。
蘭西
電郵地址：
