較早前，日產汽車公布咗2003年4月嘅汽車製造、銷售及出口數據，成績可謂令人感到鼓舞；喺汽車製造方面，日產於日本本土嘅生產線，合共產製出109,319部新車，較2002年同期上升3.4%；有此成績出現，相信與多個新車款如350Z、Cube（下圖）及Teana廣受車迷追捧有關，但海外生產線嘅總產量，就因為受墨西哥及英國廠房產量下跌影響，導致較2002年同期下跌3.0%（只有115,079部）。至於銷量方面，4月份日本本土銷售情況較為疲弱，連小型車輛及商用車計算在內，廠方共售出46,021部新車，比去年同期下跌11.9%，但響加拿大及歐洲地區則錄得強勁升幅，分別售出6,654部（升2.6%）及43,894部（升11.1%）新車。另外，由日本出口往其他地區嘅新車數目，更錄得高達12.6%升幅，數目高達55,394部，其中私家車更佔上45,057部呢！