呢期似乎唔少上市公司都鍾意打開口牌，好似上周東強電子（615）就講明，有意印公仔紙集資。今次又輪到鞋股新怡環球（1094）刊登通告，話獲得一位獨立第三者洽商要求配股。
由於近排多隻鞋股，例如裕元（551）、信星（1170）同埋新灃（1223）股價都有極佳表現，新怡亦蠢蠢欲動，搭晒棚十分熱鬧，搞到小初心思思，手多多想炒番轉。
不過，近排經常向小初推薦鞋股嘅經紀黃話，佢唔反對小初買新怡，但就抗議小初將新怡同佢3隻心愛鞋股並列。小初問佢，係唔係嫌新怡規模唔夠佢嗰3隻愛股大？
經紀黃話，呢個係其中一個原因，另外一個原因，就係新怡當日由創業板股神童P君幫手上市，佢向來對P君印象一般，而且據講隻股貨源極為集中，人哋鍾意點玩就點玩，小初若想上車，只宜投機短炒，萬勿作為長線投資對象。
慕容小初