響芸芸多款日本開篷跑車中，要數最受歡迎嘅車款，相信一定唔會得萬事得MX-5一份兒；皆因佢除咗歷史悠久之外，性能表現更係接近跑車水準㖭！今回《用車報告》主角Hilton，喺外國留學時已被MX-5所迷倒，並於畢業後立即購入呢部DreamCar作座駕；今日不如一齊嚟睇吓，Hilton對MX-5嘅感覺係點吖！
記者、攝影：李志強
「點解會對萬事得MX-5情有獨鍾？可能同我當年響美國讀書，聽到唔少讚賞MX-5消息有關啦！而且我重好留意佢嘅各樣事情，可惜當時未有車牌，所以一直無緣擁有呢！」Hilton說。然而，佢指出車子本身造型，會係令人心動嘅原因，尤其係現有用上「明燈」設計。「重有呀！部車除咗能夠畀到我有出色性能表現外，操控表現亦都唔差，就算以較高速度在路上飛馳，MX-5仍予人有穩重嘅安全感，過彎時亦都好穩定，就連MX-5會內各位成員，都異口同聲對此讚好呢！」
Hilton部MX-5配用較少見嘅墨綠色車身加杏色內櫳，聽落已非常特別，佢更加為座駕裝上一套由美國訂購回來嘅日本製周年紀念版合金車軨，並專程到美國購買多一套排氣喉回港。「呢套周年紀念車軨雖然尺碼同原裝相近，但表面經過拋光，加上甚為罕有，單係一條車軨嘅售價已達三千多元。
至於排氣喉，由於我想配合車身嘅對稱設計，所以特別換上由美國製造嘅左右雙出式排氣喉組合；但可惜呢套喉聲浪太高，加上催化器都被拆掉，因而令引擎頭段輸出降低不少，就算現時裝回催化器，都與原裝一套有些許差別。故此有機會的話，我一定會裝回原裝，因廠方特別於排氣聲響作出調校，有別一般跑車，而且重要來得更動聽呢！」Hilton說。
「其實喺買車前，我都曾經考慮過本田S2000及豐田MR-S；但我覺得S2000始終係一部終極跑車，動力輸出之大或未能適合香港路面環境使用，而車價亦較萬事得MX-5貴出一截。而MR-S亦係一部好車，但奈何保險費太高，加上不少保險公司都唔肯承保，因而令我放棄選擇佢哋嘅念頭；就連來自德國嘅保時捷Boxster，亦曾成為考慮之列，但我有些許擔心部車嘅耗油量及維修問題。」故此綜合以上各種考慮因素，Hilton便決定選擇以MX-5作座駕，因其實用又經濟嘛！
香港不少車迷，都會加入同自己座駕款式嘅車會，從中認識一班新朋友之餘，更可以互相交流汽車上嘅心得；Hilton亦唔例外，佢除咗加入香港MX-5會外，更曾當上會長㖭！「MX-5會令我學識唔少關於汽車嘅知識，亦認識到唔少新朋友；車會內各會員都好斯文，而且重傾得非常投契㖭！如果對MX-5有興趣，不妨上網睇吓MX-5會嘅網頁（網址為
Hilton曾經試駕過並配用6前速手波嘅新版MX-5，佢覺得由於新車用上尺碼較大嘅輪胎，故此響起步反應及操控表現上，都不及第二代靈活，但車廂及外形設計，卻畀到人有濃烈嘅跑車味道，難怪佢話若然有機會，定必購入多一部新版MX-5，以圓希望擁有不同MX-5型號嘅夢想呢！
引擎：1839cc直4DOHC
馬力：145ps/7000rpm；扭力：17.1kgm/5000rpm
尺碼：3955×1680×1235mm
軸距：2265mm；車重：1100kg
新車售價：$279,000（萬事得汽車：28931112）
向來走開篷小跑車路線嘅萬事得MX-5，自十多年前推出以來，一直不乏捧場客支持，就連地方細細嘅香港亦唔例外；然而，本港代理更於2001年下半年，引入配用可裝拆硬頂，同埋4前速自動波嘅第二代型號，後來更於2002年下半年，運嚟配用6前速手波及改用16吋胎軨嘅新型號抵港，因而令MX-5再一次成為車壇佳話。