李彩樺（Rain）年紀輕輕便要代父還債，肩負起沉重的擔挑，但阿Rain卻沒半點怨天尤人，並笑言不會讓自己活在黑暗中。現在阿Rain每月只有二千元生活費，回家吃飯只是捱麵包和吃蛋撻，希望省點錢早日還清債務。
阿Rain連日來談了很多關於負債的事，概括而言，其父幾年前的海味生意失敗，舖頭關掉了，欠下過百萬貸款未還。
阿Rain一出道便代父還債，由三年前做模特兒到現在做歌手，小心省回來的積蓄全都花在債務上。
不過早前阿Rain的雙親又被追債，原來他們炒股致損手爛腳，欠下人家二十多萬，這樣舊數未清，新數又來，父親今年年頭跑掉了。兩個月前，阿Rain的父母離婚，擔子忽爾由十九歲的阿Rain一力扛在肩頭上，對於以上種種不快事，阿Rain沒半點怨天尤人，反而積極面對人生，努力賺錢還債。
阿Rain現在要做慳妹，每月給自己二千元零用錢，日花不過七十元，但阿Rain仍充滿阿Q精神，她日前接受訪問時說：「二千蚊都差唔多啦，公司有形象指導幫我借衫，平日我多數返屋企食飯，一係食蛋撻，或者食麵包，我覺得好味喎。」
最近阿Rain接拍了纖體廣告，將酬勞全用在還債上，阿Rain說：「今次接呢個廣告好開心，有人搵我做嘢，又有得瘦，啲酬勞雖然攞嚟還錢，但其實跟住嗰幾個月，我要返廣州拍《功夫足球》，到時拍嘢都唔使用錢。」
這次阿Rain獨個兒面對群眾，獨個兒還債，提起一走了之的父親，她仍能心平靜氣地說：「件事都發生咗囉，我幫到幾多就盡量幫，細個嘅時候，爹哋係一家之主，𠵱家到我變咗一家之主，感覺又唔會太唔開心嘅，我會好努力面對，我唔會俾自己生活喺黑暗之中。」
問阿Rain會否怨父親？她說：「我始終係佢嘅親生女，我亦都冇嬲過佢，因為唔想繼續有仇恨，仇恨係會傳染嘅，只會令到更多人唔開心。」
阿Rain續說：「爹哋媽咪都唔想分開，但佢哋既然決定咗，我都會尊重佢哋，我唔識得點樣去做一個和事老，不過遇上呢次打擊，係會令人長大，我都覺得自己成熟咗好多，好似人生如戲咁，但我就戥媽咪慘，所以我會一直跟住媽咪，唔會自己出嚟住，等佢可以有人照顧。」
