美國歌手JustinTimberlake同ChristinaAguilera，今個星期四一齊喺鳳凰城展開以「Justified&Stripped」為名嘅全美巡迴演唱會。為咗谷宣傳，早排佢哋齊齊幫音樂雜誌《RollingStone》影咗一輯封面照，影相當日佢哋又攬又錫，一個就超低V，一個就狂騷肌肉，懶係親熱咁，擺到明就係玩Gimmick博宣傳！
其實自從Justin喺今年年頭宣布會同Christina合作做巡迴演唱會後，外間就一直話佢哋兩個夾計𠱁一眾妹妹仔同麻甩少男入場，據講𠵱家已經賣出咗成九成門券，就知佢哋兩個的確奸計得逞。
講開Justin，我羅拉好自然就會諗起佢前女友BritneySpears。Britney近排就慘啲，話說佢籌備緊新碟，由於今次隻碟要走成熟路線，搞到Britney成日要將自己困喺錄音室度等feel到，可謂斯人獨憔悴，重肥咗好多㖭！
而早排染咗一頭啡髮嘅Britney，唔知係咪唔想被人攞嚟同染咗黑髮嘅Christina比較，近排又將啲頭髮染番做金色，不過我羅拉睇佢同貓王個女麗莎瑪莉前日喺新澤西，為一個電台主辦嘅節目表演時，個樣殘到嚇親人，就算着件背心凸晒點出嚟都係一樣咁趕客囉！