時光倒流，昔日女高官「手袋黨」最風光嘅日子噚日喺港大重現！久違嘅陳太（唔係陳馮富珍，而係陳方安生）出席港大文學院建院九十周年慶祝活動，做演講嘉賓，三位現任常任秘書長李麗娟、李淑儀及俞宗怡都有捧場，順便敍一敍舊，原來佢哋四位都係港大文學院嘅舊生。
陳太演講，台下觀眾非常熱烈，幾乎迫爆港大黃麗松堂，有啲中學生嚟遲咗冇位坐，重差啲要罰企。陳太同大家講，疫情最嚴重嘅時候，佢咁啱要去英國開會，去咗兩個月，喺外國見到香港人咁團結，又見到醫護人員咁英勇，非常感動，以身為港人自豪。
八方見今時今日嘅陳太都幾開心，噚日不時有Fans搵佢簽名，老公成日貼身保護，成個私人保鑣咁，離開時兩公婆重十指緊扣鬼咁煙韌。聽講最近陳太個仔忙於讀書考試，要阿媽幫手湊孫，陳太又多一樣湊孫樂。
李麗娟同八方講，陳太兩三個禮拜前由英國返香港，一知道有護幼基金，即刻就捐咗一大筆錢，數目李麗娟唔肯講，總之就話係好多啦。
﹙圖﹚（左起）俞宗怡、陳太、李麗娟係乜嘢組合？陳太手上嘅手袋提醒大家：「手袋黨」再現！ 馬泉崇攝
傳真︰2623-9278
電郵︰