呢個禮拜焦點係周中嘅兩場國際友賽，其中以星期二英格蘭主場對塞爾維亞和黑山呢場有睇頭；不過，塞黑教練沙維斯域話明會放晒二十四個球員落場，我求大俠奉勸想買塞黑下盤嘅朋友，都係諗諗先好。
沙維斯域話：「我哋要喺九日內踢三場，當然唔想球員受傷，加上對英格蘭只係友賽，我會畀二十四名球員輪流上陣。」咁又唔怪得沙維斯域，塞黑除咗賽期密之外，佢哋有唔少球員喺西班牙搵食；好似前鋒米路斯域同高華斯域咁，佢哋喺星期日先喺西甲聯打完波，又要拿拿臨飛去英格蘭，就算沙維斯域想畀佢哋踢足九十分鐘，相信佢哋都未必有咁嘅體力啦！
至於英格蘭雖有後衞李奧費迪南因傷唔踢，但新星前鋒朗尼就冇事可以披甲；加上有主場之利，我求大俠就認為英格蘭可以秤先啲嘞。
我求大俠近排一早起身睇NBA季後賽，今季賽事幾有睇頭同戲劇性；話時話，澳彩噚日就開咗總決賽兩隊嘅奪標賠率，馬刺一點三倍就係大圍賠率，不過想敲冷博網隊者，就好唔抵咯，得三倍；世界上其他「大網」，多數有三點七倍，即係差二成幾，隔籬埠食水深啲喎！
阿根廷聯賽勁旅河床，季初委任智利籍教練比歷連尼領軍，但球隊今季成績麻麻，聯賽暫排第三，幾日前重喺自由盃出埋局，球迷都高呼要換教練。但比歷連尼就唔肯走，話教得幾耐得幾耐！我求大俠都佩服佢夠厚面皮，不過𠵱家經濟唔好，又難怪佢唔想成為失業大軍嘅！
講開阿根廷，名宿阿迪尼斯就受到日本嘅東京1969邀聘做教練領軍；阿迪尼斯唔使點諗就應承咗嘞。梗係啦，都話咗阿根廷經濟唔好，去日本掘金好過。呢位前熱刺球員及領隊，早年都教過日本嘅清水脈搏及橫濱水手，喺日本好有人氣，再度回歸一定受歡迎！
德國嘅聖保利今季喺乙組打到降班，重因財困，來季隨時降到落丁組！佢哋成立咗個「救救聖保利」基金，重要求提高當地啤酒零售價少許，將多咗嘅純利當係籌款，希望球迷多飲啤酒挽救球會。我求大俠覺得掂喎！德國人飲啤酒當飲水，一定有效啦！
佐敦早排突然俾巫師嘅大老細炒魷，冇咗波神呢個大靠山射住，佢「條靚」教練哥連斯，噚日步波神後塵。
不過同人唔同命，波神有大把人爭住請佢，但喺哥連斯睇呢都要加入失業大軍，皆因呢個夏季嘅教練市場人才濟濟，先有雲根迪同史拉斯，最近又多埋布朗，真喺輪都未輪都哥連斯啦！