中銀香港（控股）有限公司突然宣佈，委任XiaoGang（肖鋼）為董事長兼非執行董事（代替劉明康），和廣北為執行董事兼行政總裁，代替劉金寶。
呢位Xiao先生究竟姓「蕭」還是姓「肖」？只有兩份報紙（《文匯》、《蘋果》呢兩份絕少啱key嘅報紙）叫佢做蕭鋼，其他報紙（包括《大公報》）都稱「肖鋼」。左丁山認為內地簡體字之中，「蕭」嘅簡體即係「肖」，應該以「蕭」為正確。
但賓架陳指左丁山過份武斷，因為五月二十八日《南華日報》刊登中銀香港嘅正式通告，內裏明明寫住：「Mr.XiaoGang（肖鋼）」，所以賓架陳話：「肖就肖啦，你唔可以話係『蕭』，人哋正式通告都話『肖鋼』，重有得拗咩？」
左丁山就係要拗，打電話搵兩位中銀集團前高層，賓架N同賓架C都話識咗Xiao先生好耐，一定係姓「蕭」，唔係姓「肖」，「肖」只不過係簡體字而已。中銀嘅通告，唔識繁體簡體之分，擺咗烏龍，因為喺中國嚟講，「蕭、肖」相通也，睇嚟中銀香港嗰位公司秘書JasonC.W.Yeung要學吓簡體字繁體字嘅分別！
簡體字變繁體，不時有笑話，上海一位「范」董事長以前寫信畀左丁山，佢用簡體字寫，為左丁山着想，次次叫佢秘書打字轉為繁體至傳真過嚟，於是「范」董事長一定變為「範」董事長，姓都改埋；但係「之后」改唔番「之後」，年輕人學中文，要注意呢類細微分別。