上星期五開緊市嘅時候，伏勝突然收到老友嘅「飛鴿傳書」，話要睇實新萬泰（433）、上海置地（164）同埋上海地產（067）呢幾隻股票。伏勝最初以為佢哋會有大製作，不過後來個老友再打嚟，佢話呢幾隻同上海幫有關嘅股仔可能會好大鑊，皆因日前其中一個大戶手上用作抵押嗰批上海地產股票，傳已經被銀行沒收咗，間銀行嘅高層重可能因為濫用職權批出貸款而被免職。
雖然傳聞只係話單嘢同上海地產呢隻股份有關，但係有知情人話，呢次可能涉及嘅層面會好廣。
話說個大戶貴為上海幫掌門人，揸咗一系列上海概念股票，有批貨按咗畀證券行，今次首單消息曝光後，即刻傳出有證券行唔再畀啲客用孖展買呢幾隻股票，驚有人為咗甩身而氹證券行接貨，重即時追Call孖展，睇嚟呢鋪都幾麻煩。
上禮拜有好幾隻新股舉行推介會，伏勝呢排比較得閒，所以就跟咗其中一個行家，去一間同隻中遠國際（517）發音相同嘅中軟國際（8216）推介會。
呢隻股仔嘅主業係為國內政府機構提供互聯網解決方案，雖然話係同政府打工，不過所賺到嘅錢就唔係好多，加埋唔知佢哋收費嘅準則，分分鐘可能今年有錢賺，下年就另一番光景，所以伏勝對呢啲股仔興趣唔大。
雖然隻股冇乜睇頭，但當日不但座無虛席，重搞到要加枱，就算唔打得都睇得。聽啲行家講，佢哋為咗幫間公司造勢，所以任何行家只要得閒嚟都無任歡迎，聽聞隻股已經有大戶包起，所以有時都唔可以唔讚吓公關公司嘅功力了得。
伏勝