「我同呢個人有啲嘢」
馮仁昭四圍超：Juno狂唱華仔冇尷尬

麥浚龍（Juno）前晚喺理工大學賽馬會綜藝館出席「新人王Juno玩得Show」。Juno爸爸麥紹棠、盧巧音、鄧健泓、戴夢夢同導演黃真真都有去捧場，不過同樣係被邀請之列嘅蕭正楠就冇去。

放煙花揼本
Juno前晚見咁多人支持佢，感動到喊起上嚟。不過Juno表演時落本又落力，除咗有舞台煙花外，重同着透視裝嘅女舞蹈大跳辣身舞㖭！Juno亦唱咗三首劉德華嘅歌，分別係《流浪》、《一起走過的日子》同《獨自去偷歡》。
Juno話：「我同呢個人（劉德華）有啲嘢，唔知點講，唔識解釋畀大家聽，我唔會走勻全香港同人解釋。我揀得唱人哋嘅歌，嗰個人一定有重要性，我唔想人哋成日話華仔加Juno等於尷尬。我尊重呢個人先唱佢嘅歌，朋友唔係要攬頭攬頸先叫朋友。」

賈靜雯膽大獨怕蜘蛛
台灣女星賈靜雯𠵱家喺無錫拍劇，日前接受訪問時大爆自己有個外號叫「賈大膽」，因為無論係青蛙、兔仔定係蛇，佢都冇有怕，重大膽到將蛇套喺頸度玩。賈靜雯重話如果第日唔做演員，就會做動物園管理員。佢又話細個時養過貓頭鷹同猩猩仔，不過佢都有個死穴，就係最驚蜘蛛！

Eason網上賣碟踴躍
陳奕迅（Eason）最近喺台灣出國語碟，雖然沙士喺台灣肆虐，原來Eason隻碟依然賣得唔錯喎！Eason兩個禮拜前用網上賣碟呢個方法谷碟，反應好好，唱片公司都冇諗過網上賣碟會有咁好嘅成績。另外，Eason呢幾日原本要拍電影《豪情》，但因為導演陳慶嘉忙緊拍《戀上你的床》，所以要等《戀》片拍完先至可以再復拍。

吳國敬考驗霆鋒
吳國敬嚟緊十號同十一號兩日會喺紅館開演唱會，佢對呢次演唱會好緊張，重不停打友情牌。阿敬日前話：「第一場會有Sammi（鄭秀文）、Eason（陳奕迅）同謝霆鋒。第二場就係安仔（許志安）同Kelly（陳慧琳）。」問阿敬怕唔怕霆鋒臨時甩底？佢話：「霆鋒話一定唔會放飛機，我就以呢次承諾考驗大家友情。」

李安取消返台宣傳
導演李安本來計劃呢個月返台灣，宣傳本月二十號喺美國上畫嘅荷李活新片《變形俠醫》，但因為台灣𠵱家沙士疫情嚴重，電影公司為咗演員同李安嘅安全，臨時決定取消去台灣嘅行程，不過套戲仍然會喺本月二十八日喺台灣上映。