名模李嘉慧昨日往九龍灣展貿中心演出婚紗show，她表示在SARS減退後工作量回復正常之際，卻不幸破財。早前她在銅鑼灣逛街時銀包不翼而飛，她稱破財事小，最心痛是失掉與家人及男友的合照。
名模李嘉慧昨日往九龍灣展貿中心演出「新fun嘉年華」婚紗show，她表示SARS疫情減退後，工作量漸告回復正常，但日前她竟遇扒手。
李嘉慧表示日前在銅鑼灣逛街時，其間打開手袋拉鏈，不到五分鐘已發覺手袋內的銀包不翼而飛，她說：「以後真係要打醒十二分精神，唔知係咪經濟差，啲扒手喺鬧市都咁猖狂。
「嗰日我銀包都係得千幾蚊現金，但最麻煩就係要補領過啲證件，而我同屋企人嘅全家福同男友嘅合照都喺裏面，既然都要買過個新銀包，我諗住同男友一齊買個情侶款嘅。」
問李嘉慧有沒有留意林子祥在紅館墮深洞的意外，李嘉慧說：「我哋行catwalk好多時都要適應唔同設計嘅舞台，如果行啲要升高同埋斜嘅台，我會特別行得慢啲。除咗主辦單位代買保險外，我自己一向都有買保險嘅。」
此外，李嘉慧正修讀港大公開大學的finance課程，她表示讀多一年便畢業，所以無論工作如何忙碌都會妥善分配時間，她說：「我男友Vincent都係讀finance嘅，就等如有個補習老師喺旁邊，有時啲功課唔明，問佢就搞掂。」
炎夏將到，本身已十分苗條的李嘉慧亦嚷着要減肥，她說：「我已經減少咗食澱粉質食物，多啲食菜，好快已經達到我理想嘅磅數一百一十磅，因為我有番咁高，再瘦啲就唔好睇。」
採訪：JessicaNgan 攝影：EdwardChou
