近兩屆歐冠盃都係由收費台全程直播，要打到決賽先有免費頻道直播，對冇裝或者裝唔到收費台嘅普羅市民嚟講，真係睇少好多場好波；不過，我求大俠收到風，有本地免費電視台會響下屆全程直播歐冠盃，相信呢個消息對廣大球迷嚟講，肯定係大喜訊！
其實早排已經收到料，近幾年差唔多主攻NBA嘅絲帶台，好積極搞緊直播歐洲主流足球，早輪忽然出招，直播咗場英甲聯賽森林對狼隊，雖然之後冇咗下文，但佢哋並唔係「胎死腹中」，而係正密密傾緊購買下屆歐冠盃嘅免費頻道直播。
據聞呢單嘢重有啲細節未搞掂，所以暫時未講得住，但成事機會相當高；而絲帶台重準備重召過咗星洲ESPN亞洲總部嘅一位講波佬回巢㖭！
我求大俠噚日至講完摩納哥因為莫財可能被勒令降班，又擔心無財團注資解困。生意佬就無份嘞，摩納哥王子阿爾伯特就仗義出手，有救囉。佢話以佢同球會多年嚟嘅親密關係，當然唔會見死不救。不過佢亦批評球會高層管理不善，相信佢注資後會發生人事大地震。
布雷西亞教練馬索尼日前宣布辭職，雖然佢無講到出口，但斷估因會方決定賣走幾個主力，令佢憤而劈炮。我求大俠最怕佢一走，好可能影響到追隨佢多年嘅巴治奧去向，更有小道消息話巴治奧索性退休㖭。希望呢啲係煲水新聞，否則我同大棚巴治奧躉都會好傷心。
AC米蘭前日凱旋返米蘭，射手恩沙基繼捧盃時專霸搶鏡位，又再當「攝石人」，回程時特登走去機頭揸住旗向球迷示意。唔鍾意基仔嘅人或者對佢嘅行為反感，但諗深一層，佢響季初真係弗到漏，而且佢年紀都唔細，難得有得威水吓重唔威盡咩，人之常情啫。
歐洲主要球賽陸續收鑼，但波友咪以為暑假足球博彩嘅真空期會好長，一來西甲要六月下旬至收咧，跟住又有西班牙盃決賽跟尾；其間又有洲際國家盃，然後德國波響七月中開始踢聯賽盃，德甲聯就到八月初開鑼。
如果你唔鍾意賭北歐或美國大聯盟等賽事，休賭期大概得兩個零禮拜左右。
英國《太陽報》日前引述巴塞隆拿會長候選人路維拉嘅說話，佢口輕輕講有信心用四千萬鎊購入曼聯前鋒雲尼斯達羅。暫時重係一面之詞，我求大俠當然唔信，反正《太陽報》不嬲鍾意吹水，最近日日報道呢個候選人會買邊個、嗰個候選人又話買邊個，啲候選人博選票啫，唔好盡信。